أصعب قرار

عارفين لما بدأت أكتب يومياتي دي ما كنتش فاكرة إني هكمل فيها وإني هلاقي كلام أصلا أكتبه وخاصة إني فعلا مش بحب الكتابة بالعامية ، بس في حاجة جوايا بتخليني أحب أكتب وأحب كمان تشاركوني اللي كتبته على الرغم من قلة التعليقات اللي سببها إني مش بدخل مدونات ناس كتير وأتفاعل معهم لضيق الوقت و كمان لانشغال أصدقائي اللي اتعودوا يدخلوا المدونة .

المرة دي هكتب بالعامية وبالفصحى ويمكن مش هبطل كتابة رغم إني لأول مرة أحس إن الكتابة مش وجع لذيذ لا دي وجع صعب قوي ، وجع مر .

وجع ممزوج بآآآآآآآآآآآآآآآآه كبيرة .

هتسألوا سببه إيه الوجع والألم الشديد دا  ؟

أكيد هقول طبعا بس حتى الكلام صعب يخرج ، أصله لما يكون ممزوج بطعم الإهانة لازم تكون ولادته عسيرة .

بعد حديثي معه سألت نفسي إحنا بنكتب ليه  ؟

طول عمري عارفة إجابة السؤال دا كويس ، لكن دلوقت أشك إن كنت عارفة أي حاجة .

عارفين لما تحسوا بإنكم ماشيين في دنيا كبيرة واسعة والناس كتير قوي لكن من كل الناس دي يقع عليك الاختيار عشان تجيلك ضربة في الضهر تقصم وسطك .

حاجة كده م العيار التقيل اللي في لحظة توقعك من غير ما تدرى وتلاقي نفسك بعد ما كنت وصلت لنص الطريق ولاَّ يمكن خلاص حطيت رجلك على أول درج السلم بقيت تحت الأرض في لحظة .

بيني وبينكم قلبي واجعني من ساعتها يمكن مش أنا صاحبة المأساة لكن أنا ليا طرف كبير قد يكون عشان أنا صديقته ويمكن عشان صاحبة قلم كان كل همي الناس ، الناس البسيطة اللي أنا منهم ، اللي كنت فاكرة إن بقلمي ممكن أغير عالمهم للأحسن ، أو إن بقصة من قصصي ممكن أخدهم شوية بعيد عن همومهم في لحظات عابرة أقفز بيهم من فوق صهوة حصان الواقع المر لباحة الخيال الحر .

لكن لما تلاقي الناس دول هما اللي ممكن يقضوا عليك ، هما اللي ممكن يقتلوك ، هما اللي ممكن ينسفوا حلمك اللي هو غرقان في مشاكلهم وهمهم .

هتحس بإيه ؟

حطوا نفسكم مكانه ومكاني ، وفكروا شوية هنعمل إيه ؟

ويبقى تعبنا وألمنا لمين ؟

حد ولا حاجة مد إيده في لحظة هدم عرشك ، شدك من فوق جبل حلمك وزرعك في الأرض في ثانية واحدة .

حد من اللي إنت عايش ليهم وبيهم ، وفاكر نفسك الفارس المغوار اللي بسيفه البتار هيحارب ويقاتل بقوة لحد ما يرَّجع ليهم الحق لكنه في الآخر لقى نفسه بيحارب طواحين الهوا .

التاريخ بيقول إن كل مناضل وكل صاحب قلم كان همه مش بس الأرض . لا…..  والناس اللي ع الأرض ، حماية الإنسان والاعتلاء بيه ، الدفاع عن الضعيف عن  الحق عن المبادئ التي ترسي الحياة على الأرض ، مش تحقيق أمجاد شخصية ، اللي بيسعوا للمجد الشخصي دول شخوص متسلقة عرائس وهمية بينساهم التاريخ زي ما كانت الناس الحقيقية بتنساهم .

لكن دلوقت لما فقدت الناس هويتها لما فقدوا إنسانيتهم لما بقوا لا شيء فقدنا إحنا الإحساس بوجودنا برسالتنا اللي هما مش حاسين بيها وتايهين .

بس يا ترى دا عيبنا إحنا ولاَّ عيبهم ولاَّ العيب في النظام ؟!

لما قالي عايز أبطل كتابة كنت عايزة أقوله لأ ، لكن لما فكرت لقيت إني لازم نبطل نكتب لو هو دا الحال بجد .

بس الكتابة مش قرار ، لما في يوم لقيتني بعرف أمسك القلم وأقول بيه كل شيء ما كانش قراري ، ولما الفكرة بتدق راسي وتفضل عليه تدق من غير رحمة خروجها برضه مش قراري لأنه قرار اضطراري مبعثه البحث عن الراحة .

يبقى إزاي بأة هقدر أوقف قلمي وأقوله كفاية عليك كده ؟

الدموع المتحجرة في عينه وعيني بتقول إننا مش هنقدر ناخد قرار الحظر أقصد قرار الأسر ، أسر القلم والورق ، أسر روحنا ، ما أصل الكتابة دي روحنا .

9/8/2008