صداقة

كل سنة وانتم طيبين رمضان ع الأبواب وفترة بياتي الشتوي قربت ، رمضان بالنسبة ليا صعب شويتين مش عشان بنحرم من الأكل خالص والله أنا مش أكولة بس بتعب شوية وبنحرم من معشوقي الأول والأخير الشااااااااااااااي

تعرفوا اليومين دول بطلت اكتب عن يوميات مدينتي وبحكي معاكم يومياتي الخاصة يمكن عشان بطلت انزل البلد وابص ع الناس وكل اللي بيربطني بيها الطريق اللي بقطعه كل يوم من البيت للشغل ومن الشغل للبيت سبع دقايق مشي بمشيتي الرايقة الصبحية

ملحقناش نخلص من امتحانات الثانوية وتنسيقها اللي لسة ما خلص إلا وفاجأتني الستات الحلوات زميلاتي في الشغل ببداية الدروس الخصوصية من شهر أغسطس والمدرسين وأيهم أفضل في الانجليزي ومين اشطر في الرياضة طول النهار باسمع حاجات غريبة وكله كوم والأسعار اللي بقت فيها الدروس سعاااااااااااار والله سعار اسمه الدروس

أنا بهرب من الموضوع اللي كنت عايزة أتكلم فيه سامحوني

كتير حاولت أقولكم وتراجعت ودلوقت عايزة احكي لكم ومش قادرة بس كل الحكاية تتلخص في إني مصدومة ومنهارة والدنيا قلباها معايا اسود في اسود والحروف واقفة والكلام بعيد والدنيا مش اللي هيا خالص

بس عارفين أنا دلوقت قاعدة بكتب لكم وأنا في الحالة دي ليه عشانهم هما مش عشاني عشان اشكرهم اقصد اشكرهن ايوة اشكرهن لولاهن ما كنت على قيد الحياة

صديقاتي الجميلات :

دايما كنت بعتبر الصداقة أهم ما في الحياة وما اعتبرته صار حقيقيا بعد تلك الأزمة ارتكنت عليهن سقطت بين أيديهن فوجدتهن أمامي جبلا شامخا من المساندة ومن التواصل والمساعدة .

آهٍ سيدات مجلس الحرب لو تعلمن كم أنتن رائعات

مجلس الحرب معدش فيه أنا وهند ومروة ومنال بس ، لا بقى كمان فيه نور وإسراء آخر العنقود بنتوتنا الصغيرة أجمل اتنين عرفتهم

هند مهما كنا مختلفين شكلا هتفضلي اجدع بنت عرفتها .

 منال الرقيقة في البعد بتفضل روحها سند وعون .

مروة المجلس القومي للمرأة كله اشتكى أكيد من مكالماتك ليا بس ما يعرفوش يا حبيبتي إنتي واقفة معايا إزاي .

أما نور وإسراء فدول حكاية رائعة من الجمال معرفتي بيهم حديثة جدا جدا لكنها معرفة وثيقة جدا وشعرت أنها معرفة نشأت من سنين طويلة قوي ومن كتير شبه بينا لقيت إسراء بعفوية بتسألني هو إنتي برج إيه  ، فهمت قصدها من السؤال وما عقبتش طبعا هي عايزة تعرف برجي وبرجها صفاتهم متشابهة ولا لأ ؟

يمكن لو ماكنتش عرفت إسراء ونور كنت فضلت عايشة الوهم اللي كل كلمة فيه عارفة صحتها وبرغم كده راضية وساكتة ، لحد ما جه الوقت وبصيت لقيتني لازم افتح عينيا المغمضة وأتكلم بأة وأقول كفاية كده ، لحد إمتى ؟

كان لازم أصحا وأفوق من وهمي وأبص قدامي وأشوف شغلي وحالي اللي توقف ، صحيح لسة مش متوازنة ، صحيح لسة بفكر فيه ، صحيح لسة بقول أنا مش قادرة ، أنا ضايعة ، أنا …..

لكن البني أدم منا لازم يفكر في نفسه شوية .

بس تعرفوا أنا بوجه له شكر ، ما تستغربوش كده أه والله بشكره ، لولاه كنت فضلت عايشة جوة دايرة حزني ، هو رجعني للحياة من تاني ، وعشان كده دا كان سر الصحوة في الشهور اللي فاتت ، والحمد لله كان سبب في إني أعيش .

علا بركات الصحفية الجميلة قالت لي : بكرة هتعدي الأيام مش هتنسي بس راح تبقى ماضي ، محدش بينسى حد رجع له توازنه .

هعتبره بس صاحب جميل ، وأنا رديت له الجميل مش أكتر .

يا ما نفسي علا تنضم لمجلس الحرب بس أنا عارفة ظروفها .

شوفتوا بأة الصداقة أجمل وأبقى إزاي

بشكركم يا أحلى صديقات في الدنيا

25/8/2008