راجعيييييين

راجعين نعشق وندوب ونعيش مع بعض حياتنا

فاكرين الأغنية دي لعمرو دياب ؟

أهو أنا دلوقت بغنيها عشان إنتم وحشتوني بجد جدا ، ووحشتني الكتابة ووحشني قلمي اللي كان غضبان مني ولسة بيلاوعني .

وحشني أحكيلكم وتسمعوني ، وأرجع من تاني أكتب هنا يومياتي زي الأول .

عارفين النهاردة وامبارح وأول كنت عمالة أفكر بعد الغيبة هرجع بإيه إن كان ع القصص فهي والحمد لله كتير ونفسي تقروها كلها ، لكن قعدتنا سوا وفضفضة اليوميات دي ليها شكل تاني وإحساس تاني مختلف .

فكرت كتير أكلمكم في إيه ، أكلمكم عن اجتماعات مجلس الحرب وفطار الخميس اللي فات وشجار نور مع سائق التاكسي اللي بيتأمر علينا قبل الفطار ولولا تهديده بأمين الشرطة ما كانش طلع بينا ، ولاّ ع المطعم اللي رحنا لقيناه مزدحم وبعدين حنوا علينا ولقيوا لنا ترابيزة فاضية ونلاقي نفسنا في الآخر مجتمعين على نفس الترابيزة أنا وهند ومنال ومروة ونورمع ثرية جميلة مهذبة لا يظهر عليها الثراء وثلاث من الشغالين عند أكيد حد مليونير السائق المصري والخدامة الأسيوية والشغالة الأفريقية ما شاء الله حد جامع في بيته الأمم المتحدة ، خرجنا من القعدة وبينا ود غريب مع الناس دي والأكثر مع جيجي تلك الثرية اللذيذة البسيطة في مظهرها وتعاملاتها .

وبعد الأكل كان هناك شجار آخر مع الجرسون وأيضا بطلته نور وفي كلا المرتين لديها كل الحق .

ولا أكلمكم عن مذبحة حصلت في بلدنا من يجي أسبوع وبجد قهراني قوي

مش عشان أنا خريجة زراعة لا والله أنا بانسى الحكاية دي بس عشان أنا كائن حي بيحس وبيتنفس وعارف إن أي شجرة في الدنيا رئة جميلة بتشيل عنا كتير وبتدي لنا كتير

كان في طريق الشغل دايما على شمالي كده عدد من أشجار الكافور ، شجر عتيق ( شجر الكافور بالنسبة لي دليل قوة وعظمة ، كل ما أبص لشجرة منهم بحس بالقوة قوي ليه معرفش ) ويا سلام بأة في الشتا لما المطر يغسل فروع الكافور ويبقى مزهزه كده وجميل ، صبحت في يوم الصبح رحت الشغل وكان الشجر على حاله ، وفي الطريق وأنا راجعة منشار الكهربا كان بيحشهم ولا البرسيم  منظر يقطع القلب شكل أوراق وفروع الشجر ع الأرض بعد ما خدوا الخشب يوجع بصحيح .

ولا أقولكم على أهم جامع في بلدنا اللي بأة بسوا الأرض بعد ما هدموه بحجة إن في منحة جاية من الكويت ولا ما أعرف من مصري عايش في الكويت حوالي تلاتة مليون جنيه للجامع ، لكن إحنا بدل ما نحافظ على الأثر القديم والمبنى الأصلي ونقوم بترميم وتوسيع وتنظيف ودعم لا جابوا على المبنى عاليه واطيه وهدموه ، أدي عبقرية الأداء !!!!

ولا نتكلم بأة ع الهم الكبير قوي المصيبة الكبيرة بتاعة الدويقة اتقال كلام كتير قوي وناس حللت وناس اتبرعت وناس مصمصت شفايفها وقالت يا عيني يا حرام وناس استرزقت كالعادة من ورا المصايب

لكن اللي بجد بأة كان حاجة تقرف إن كل مسئول يقولك كنا متوقعين حاجة زي دي تحصل وكان في سنة مش عارفة كام حادثة تانية ومن كم شهر جرى إيه

والنبي دا كلام طيب ليه محدش اتصرف ؟

ليه معملتوش حسابكم ؟

أستاذ هندسة مصري إتكلم من ألمانيا قال كان في علاجات بسيطة بإقامة نوعية من الحوائط تمنع الانهيارات ، حل جميل والله وممكن ليه ما فكرناش فيه لكن أستاذ الهندسة المصري بيهندس في ألمانيا وعنده حق نبقى بنكدب على روحنا لو اتكلمنا بحس الوطنية وقلنا له تعال هندس في بلدك ، بلدك محتاجة لك . لا …. بلده بجد هتدفنه بالحيا وكلكم عارفين دا كويس

في كمان حاجة يا جماعة عرفتها من ناس كانت عايشة هناك أيام الزلزال بتاع 1992 الناس دي خدت شقق من الحكومة باعوها ورجعوا عاشوا هناك في العشش واضح إن الأمر مش بس إنهم استنفعوا بالفلوس بتاع الشقق لا الأمر كمان بيئي ونفسي وحالة من التعود والاعتياد على المكان وطريقة الحياة زي ما تجيب حد وتقلعه من جذوره وتزرعه في أرض ما يعرفهاش ، يعني الأمر قبل ما يتحل كالعادة جهجهوني محتاج شغل لدكاترة علم الاجتماع وعلم النفس .

عيني عليكي يا بلدي في كل يوم مهزلة

أدي الدويقة ومن قبلها حريق المبنى العريق لمجلس الشورى ومدى الإهمال والتراخي .

تعجبت أكثر من ستين عربة إطفاء لم تقو على إخماد الحريق وطائرة هليكوبتر حربية بتملا من مية النيل ……… الله الله ، هَنا والنعمة .

كلام كتير محبوس في الحلق ومرار ما بعده مرار .

كنت كمان عايزة أكلمكم في موضوع تاني بس بجد نفسي مسدودة ما هو وسط الهم دا أكلمكم إزاي عن الحب ، عن المشاعر والعواطف ، أسألكم إزاي وتجاوبوني عن الحلم في الحب والحلم بالحب ، عن الحبيب الأناني ، عن الحبيب الطفل ، عن المشاعر اللي ممكن نديها من غير حساب وفجأة تلاقي نفسك واقف كده في وسط البحر لا منك عارف ترجع للشط ولا منك عارف تعوم وتغوط لجوة أكتر وأكتر غرقان وبس .

الحب اختيار ولا قضاء بينزل ع البني ادم كده في غمضة عين .

تقدر لو فشلت في حبك تعيش بمبدأ داوني بالتي كانت هي الداء ؟

تقدر تستبدل حد بحد ينسيك ؟

من وجهة نظري متبع المبدأ دا شخص حقير ، لا يهمه غير نفسه بس .

فشلنا عاطفيا ممكن يكون سبب فشلنا في كل حياتنا وقد يكون دافعا قويا لدى أصحاب النفوس القوية للنجاح وتخطي مراحل الفشل .

مهما حصل ومهما شفت لازلت أقول إن الحب أجمل نعم الحياة وطالما إنني أحيا فأنا فأنا قادرة على الحب وطالما أن لي قلب ينبض سوف أحب .

طولت عليكم سامحوني بس كنتم واحشني قوي قوي .

باي بأة

15 / 9 /2008