يا صباح المطبات يا مساء الدوشة ( ويوم جديد من يوميات مدينتي)
كتبهارباب كساب ، في 29 مارس 2009 الساعة: 10:54 ص
يا صباح المطبات يا مساء الدوشة
أديني راجعة لمدينتي تاني بقوة كبيرة عشان أكتب وأسجل اللي بيحصل فيها ( على فكرة اخترت اكتب عنها بالعامية ومفيش مرة بدأت اكتب إلا وتلاقيني اكتب بالفصحى وأرجع أغير اللي كتبته ما أنا بهواها بجد بس تقول إيه بقى ) .
كنت مبسوطة الفترة اللي فاتت قوي من رئيس المدينة الجديد اللي سمعت إنه بينزل يمشي في البلد ويشوف الحال بنفسه ودا مش مهم مهما عمل هو أصلا محكوم ببيروقراطية الحياة المصرية والأداء الحكومي بس الراجل كتر خيره عمل شغل كويس في البلد ما انكرش فاكرين لما كلمتكم عن الشوارع اللي اترصفت دلوقت معدش في شارع في بلدنا مش مرصوف حتى الشوارع الضيقة كله بقى بالإسفلت يا بشر لا وإيه بقى لما الدنيا شتيت لقيتني ماشية في الشارع لا غرقانة وحل ولا طين ولا خدت بريزة من بتوع …………..( لما قال زمان في بلدهم اللي كان يتزحلق يزفوه ويقولوا أبو بريزة أهه وأنا بقى كنت باخد براااااااااايز ) دلوقت مرحبا بالشتا والمطر في أي وقت .
كمان عمال النظافة باسمعهم كل يوم بما إني واحدة بتصحى مع شقشقة نور الصبحية رغم إني في العادة بانام متأخر بس برضه بصحى بدري وقبل ميعاد المستنقع بكتير ما تستغربوش ربنا يخلي لنا نوم الضهرية اللي بيظبط كل شيء من غيره بفصل مية ونور .
كل يوم تظبط عليهم ساعتك الساعة ستة الصبح بيشتغلوا ومتقسمين ورديات بتمر خلال اليوم ، فرحانة بجد رغم إنهم بيجوا تحت البلكونة ويعملوا وش بس مش مهم المهم إن في نضافة .
حاجة بقى كانت مضايقاني جدا ولسة بتضايقني وهتضايقني عربية الرش اللي كانت طول الصيف رايحة جاية مرتين في اليوم عمالة ترش وصيفنا ما شاء الله رطوبته عالية قوي وهما حلوين بيزودوا الرطوبة اللي بتعمل احتباس حراري نقوم نولع اكتر رجعت تشتغل وتمارس مهامها الجليلة .
وبما إني ساكنة على الطريق وباخد كل يوم نفس الطريق عشان أروح شغلي باخد الجنب الترابي من الطريق ألاقي في يوم زمارة وكلاكس مش مبطل قلت في نفسي يا بت خليكي ماشية إن شالله يولع هو ماشي غلط هروح إيه وسط طريق العربيات عشان يستريح .
الراجل بتاع الكلاكس زهق مني صراحة وفجأة لقيته بينده : يا أبلة يا أبلة .
بصيت له برخامة عرفاها فيا قوي .
قالي ما تزعليش كده أصلنا بنرش .
أنا مش بس كنت عايزة أطبق في زمارة رقبته دا إن كان له زمارة أصلا أنا كنت عايزة ألعن أبو اليوم .
حتى لو إنت بترش الطريق محكوم هروح فين يا غبي يمين ولا شمال ومش كفاية خليت الدنيا وحل وقرف .
بس ما نطقتش اكتفيت بالنظرة إياها وسكت وحمدت ربنا إنه كان يدوب عشرين متر وأدخل الإدارة .
لازم يشوفوا صرفة في عربية الرش دي دا طقس انتهى من زمان حتى معدش في عيال بتجري ورا عربية الرش وكمان إحنا بنعاني أزمة المية وبشتغل في الموال دا أنا وفوزية هانم اللي عايشة حياتها مع برنامج التوافق المائي اللي قارفينا بيه وناخد دورات إزاي نرشد المية وخاصة مياه الري تبع شغلنا يعني .
وكل كم يوم نعمل جوابات للري ونطهر مصارف عشان خاطر نوفر نقطة المية ومعلقين رسومات تقول إن نصيب الفرد بحلول عام 2030 هيبقى ولا شيء لكن لا حياة فيمن تنادي إحنا شعب اتعلم البعزقة، اللي محتاج طماطمتين يشتري اتنين كيلو ، واللي عايز تفاحتين يشتري كرتونة ، واللي عايزة تملا كوباية تنسى الحنفية مفتوحة ( وتفضل ست سنية حنفيتها تنقط مية ).
فاضل إيه بلاش أتكلم على شغلي أحسن أحد الأصدقاء قالي إنه بدأ يشفق على زملائي على العموم مفيش جديد غير بس كوبيات الشاي اللي بقدرة قادر اختفى نصها ربنا يستر وما نختفيش إحنا كمان .
**********
يوم الجمعة 27/3/2009 رحت زي الشاطرة كده انتخابات اتحاد الكتاب بصراحة كان يوم جميل قوي والتقيت بناس أفاضل وبصحبة زي الفل .
ورجعت يا عيوني مشتاقة بقى للنت وللفيس بوك اللي خلاص جنني بجد وفجأة وأنا قاعدة عمالة أتصفح الرسائل اللي جاتني وأشوف صفحتي سمعت خير اللهم اجعله خير كل شوية حاجة تتهبد وتترزع مجاش في بالي واندمجت وكل ما يزيد اندماجي وتسرح أفكاري مع حاجة جديدة نطت براسي وكنت عايزة أكتبها ورغبة قوية اطمن ع الناس اللي وحشوني ألاقي الصوت يعلا ويعلا قلت ما بدهاش بقى قومي يا بت شوفي جرى إيه وعينك ما تشوف إلا النور مطبات جديدة ( المطبات الرفيعة اللي هي عبارة عن خطوط متلاحقة ) يجي عشرين واحد قدام البيت يا مصيبتي هو أنا ناقصة وش لما كمان ألاقي رزع ما كفاية الطريق ودوشة العربيات كمان رزعة العربية على الطريق لأن المطب منخفض مش مرتفع العربية مش بتهدي عليه بتاخده مرة واحدة فتلاقيها طالعة نازلة تهز الأرض وألاقي البيت بيتهز ولا هزة أكتوبر 1992 والسرير بيتمرجح ، ضغطي علي وأعصابي تعبت لا عارفة أقرا ولا عارفة أركز ولا عارفة اكتب ولا أذاكر يا وجعي ياني .
والطريق بقى كله بهذا الشكل وبقى الطريق من بلدنا لطنطا بياخد يجي نص ساعة أو ساعة إلا الربع بالمناسبة الطريق دا 12 كيلو بس .
أعمل إيه الحل الوحيد اللي قالوه زمايلي النهاردة إني أعزل .
حاضر هعزل .
تفتكروا أعزل ولا أولع في روحي أسهل على الأقل علبة الكبريت بعشرة صاغ والجاز موجود .
وآآآآآآآآآآه من الدوشة ألف آآآآآآآآآآآآه .
29/3/2009
ـــــــــــــــــــــــــــــــــــــــــــــــــــــــــ
التصنيفات : يوميات مدينتي الصغيرة | السمات:يوميات مدينتي الصغيرة
أرسل الإدراج | دوّن الإدراج
مارس 29th, 2009 at 29 مارس 2009 2:10 م
الغريب ان المطبات دي زي ما قلتي ان العربيات مش بتهدي عندها ,, طيب أمال هي معمولة ليه ؟؟؟
مش عايز ازعلك اكتر واقولك اننا مرينا برضو من فترة بتجرية المحافظ الجديد , وكان من ضمن جهوده انه استورد شركة فرنسية عشان تتولى النضافة , بس للأسف بعد ما كان شغلهم فعلا ممتاز رجعوا تاني للعشوائية المعروفة
ياخوفي يجي اليوم اننا اللي نجري فيه ورا عربية الرش ):
مارس 29th, 2009 at 29 مارس 2009 5:13 م
على الفيس بوك جاتني دعوة إني أعزل إلى الاسكندرية
كنت بفكر بجد كده هتخليني أغير رأيي
بس اسكندرية وتجربتها مع المحجوب أو كما كنتم تسمونه المحبوب كانت تجربة أكثر من رائعة فمهما كانت الشخصية اللي هتيجي بعده ستحسون انتقاصها وأنها لم ولن تفعل كسابقها رغم إنه في محافظته السابقة بالصعيد كان مضرب الأمثال لكن المحجوب مختلف
الشركة الفرنسية مش متعودة على زبالتنا ولا عشوائية زبالتنا ما حك جلدك غير ظفرك عشان كده أنا فرحانة بعمال النضافة عندنا أصلهم عمال مجلس المدينة مش استيراد
هموت بقى وأعرف أ،ا كمان المطبات دي معمولة ليه أنا خايفة ألاقي البيت بقى بسوى الأرض من كتر الهز ههههههههه
وساعتها أنا أول من هيجري ورا عربية الرش
تحياتي يا أستاذ طارق وشكرا للمتابعة الجميلة
مارس 29th, 2009 at 29 مارس 2009 5:42 م
اهلا رباب
قرات ثلاثة مواضيع من مدونتك..
أعجبني أسلوبك السلس الرشيق .
أستمتعت بوجهة نظرك وبساطة اسلوبك.
على فكرة مؤتمرنا الخميس القادم 2/4 والدعوة ما زالت قائمة
ونواجه بيروقراطية تخلي القرد يقطع
لكن بنحاول نكمل مشوارنا
مارس 30th, 2009 at 30 مارس 2009 10:01 ص
أستاذي العزيز : سمير الفيل
سعدت جدا بوجودك في بيتي الجميل هذا
كنت أتمنى أن تقرأ قصصي الموجودة هنا وأنال شرف تعليقك عليها
تحياتي لحضورك المتميز
دمت بكل الخير
مارس 30th, 2009 at 30 مارس 2009 12:49 م
عندما اقول انك رائعه هذا لايكفى استاذه رباب
تحياتى
مارس 30th, 2009 at 30 مارس 2009 1:35 م
الأروع هو مرورك يا أستاذ عامر
تقبل تحياتي وجزيل شكري
مارس 30th, 2009 at 30 مارس 2009 11:34 م
يا رباب استقري ف طنطا وخلاص بيعي البيت وأجري حاجة ف طنطا
مارس 31st, 2009 at 31 مارس 2009 5:09 ص
ماشي يا عم أحمد
تصدق أوفر برضه
صباحك فل
مارس 31st, 2009 at 31 مارس 2009 4:48 م
بسم الله الرحمن الرحيم
اهدى اليكم القصه الثالثه من مجموعتى القصصيه حكايات
معاصره اتمنى ان تنال اعجابكم
سباق الموت … قصه قصيره
3
2
1
أنطلق
ضغط مهاب على دواسه البنزين باقصى قوه حتى كادت قدمه
ان تخترق أرضيه سياره السباق القويه التى يقودها … نظر
مهاب حوله فرأى سيارات السباق التى تنافسه والتى تنافس
سيارته بقوه … وفجاه انتفض مهاب فى قوه حتى كاد ان
يخرج من حلبه السباق بسيارته فقد راى مهاب سياره سوداء
وعندما راى هذه السياره السوداء رجعت ذاكره مهاب تلقائيا
للوراء … للوراء قليلا ……………..
لاستكمال باقى القصه القصيره اضغط على الوصله التاليه للذهاب
للقصه القصيره مباشره
http://m20081986.maktoobblog.com/1611013
أبريل 2nd, 2009 at 2 أبريل 2009 1:37 ص
انا مش غاوى شتيمه
بس هم اللى قتلو فى العزيمه
وحبلونى بالياس والهزيمه
واقنعونى ان ده الزمن المدنس
وفضلت من فقرك اغمس واغمس
خلونى ما بقتش فاكر
ما بقيتش فاكر غير ملامح وطن حزين
ما بقيتش فاكر غير شوية عساكر بيحتلو الميادين
ما بقتش فاكر غير شيوخ بدقون بيتاجرو فى الدين
ما بقيتش فاكر غير شوارع من غير عناوين
بيحكمها بلطجيه بالسنج و السكاكين
مقطع من اخر ادراج لى
أكتوبر 15th, 2009 at 15 أكتوبر 2009 2:35 م
http://www.youtube.com/watch?v=c0CtFokQGAs