اسأل روحك

يا ترى جربت تسأل نفسك إنت اتغيرت كم مرة في حياتك ؟

أمبارح كنت إيه والنهاردة بقيت إيه ؟

مش لازم بلسان فصيح تتكلم ، قول على راحتك كدة بالراحة ، إياك تفتكر نفسك في امتحان ولا أنا أبلة ماسكة لك  عصاية لما تغلط بيها أضربك .

لأ مش كدة ، أنا بس عايزاك تفضفض وتقول من غير عقد ولا تهويل .

جربت يا ترى تبص حواليك و تشوف الناس اللي معاك  ؟

عارفهم ولا لأ ؟

أنا عارفة إنك أكلت معاهم وشربت ويمكن كمان تكون غنيت ورقصت ، وعارفة إنك على كتف حد فيهم بكيت وصرخت ، بس تعرفهم ؟!

والله حاسة إنك تعرف بتاع التوك توك  اللي بيوديك شغلك كل يوم الصبح أكتر منهم .

طيب …….. جربت تدور جواك  عليك وتلاقيك ؟

ولا تبص في الدخان اللي خارج من المنقد الصُغيّر اللي أمك اتعودت تولع فيه البخور ساعة أدان الجمعة وتشوف حياتك زيه بالظبط ، حاجة كدة ماشية من غير هدى .

جربت تسمع صوتك وتقول ياااااااااه هي الناس مستحملاني إزاي ؟

ولا جربت تسمعه بيقول إيه من الكلام ؟

عملت إيه في حياتك ؟

إديت أد إيه عشان تدور هتاخد إيه ؟

فكر ياللا ما تقفش كدة مبلم وقتي هيخلص ، عايزة أشوف غيرك ، في ناس كتير عايزين يفوقوا ، عايزين يبصوا قدامهم مش تحت رجليهم ، سامعني ولا لسة قافل ودانك زي ما قفلت عقلك من زمان ، ونسيت إنك بني أدم إنسان حيّ مش حيوان تاكل وتشرب وتنام ؟

اسأل روحك فين راحت قبل ما تسأل اتباعت بكام ؟

إن كان حد باعها تبقى إنت لما سبت غيرك فيها يتحكم وسمحت له يظلم ويِتسيّد .

ضيعت لي وقتي وبرضه ما فمتش.

ما هو اللي قبلينا قالوا العقل زينة ، مش حلية نحطها في فاترينة .

رباب كساب

8/2/2008